唔知大家仲記唔記得邊個係菊地直哉呢？之唔係嗰個因為「衰十一」而俾磐田山葉炒魷嘅日本球員囉！日職聯球會大分三神噚日突然宣佈簽咗菊地直哉，唔通佢哋諗住橫掂都護級無望，不如好似正生書院辦學方針咁，等啲曾經做錯事嘅球員有改過自新嘅機會？
搞15歲少女累山葉道歉
現年24歲嘅菊地直哉，原本效力磐田山葉，仲被視為日本國家隊明日之星，前途一片光明。點知佢就衰鹹濕同變態，07年5月喺部車度搞一個15歲嘅o靚妹，事後仲諗住用1萬日圓做掩口費；事件被揭發之後佢即時俾山葉開除，仲連累會方嘅高層要出嚟鞠躬道歉。之後佢轉去德國搵食，仲喺禾夫斯堡試過腳，可惜未能成事。結果佢簽咗當時喺乙組比賽嘅卡爾斯耶拿，上季仲隨隊落丙組比賽。
菊地直哉除咗搞過15歲o靚妹之外，傳聞仲過佢試過喺一年內同18個未成年少女有性關係，難聽啲講佢真係一個孌童痴漢。雖則佢個底花成咁，但三神一啲都唔介意，喺噚日宣佈佢正式加盟，張約仲簽到2011年1月31日。三神嘅部長原靖強化就咁講：「我哋只係唔想埋沒一個咁有天份嘅年輕球員，希望俾個機會佢。」
三神今屆包尾降硬班
三神上屆喺日職聯得第4名，又攞咗日聯盃冠軍，但今屆唔知搞乜鬼，表現走晒樣，除咗未能衞冕聯賽盃，喺聯賽仲以23戰得10分包尾，距離尾四嘅大宮松鼠有成17分，9成9降班，隨時羞家到取代前屆嘅FC橫濱，成為日職聯史上最快降班嘅球隊。唔知佢哋係咪輸到傻咗，居然咁夠膽咁做，萬一菊地直哉唔生性又去搞o靚妹，佢哋班高層切腹都有份。
撇開德行唔好講，菊地直哉頭尾喺山葉效力過6季，又參加過04年奧運會，而且話晒喺德國聯賽踢過（喺乙組同丙組聯賽上陣20場），實力同經驗真係唔使懷疑。家陣三神無情白事做咗正生書院，肯畀個機會佢重建自己嘅足球事業，我求大俠都希望佢可以好好把握，唔好再行差踏錯，如果再衰，肯定神仙難救。