內地維權律師隨時人間蒸發，公民黨大狀吳靄儀透露，香港都有類似情況。近日大狀行內流傳，一個本港大律師，據講代表一名內地商人，就一批遭香港海關扣留貨物喺香港打官司，呢個大狀上月過關深圳時，竟然被拘留問話七粒鐘先放行。吳大狀話暫時未能求證事件詳情，不過唔少本港大狀聽完都心驚，皆因難以想像有律師因為代表客人打官司而要被內地「執法」單位留難，更難以想像內地單位可以咁做，佢話如果事件屬實，真係無法無天。吳靄儀坦言，行內唔少人都替呢位大狀不值，奈何涉案人士怕高調再惹麻煩，想跟進亦無從入手。