自本月初美國司法部網站披露美國控制組件公司CCI，承認喺36個國家向當地國有企業官員同私人企業僱員行賄，包括6家中國國企，中海油（883）早前已作澄清，但噚日該公司舉行業績會，董事長傅成玉原來等緊記者提出呢個問題，結果等到頸都長，喺最後關頭終於有人提出，傅總即刻咕嚕咕嚕，將準備好嘅說話好似倒水咁倒出嚟。
傅總話，佢哋4月已收到料，即刻成立5個調查組做調查，又獲得CCI大股東IMI上海代表處嘅中方總裁回覆，嗰啲所謂賄款只係滙咗去CCI同埋佢哋代理商嘅賬戶，而唔係中海油嘅員工度，所以家暫時仲搵唔到中海油員工有受賄證據，不過一旦發現，公司講明會嚴懲，絕不姑息。
佢仲苦口婆心咁，呼籲啲國際公司做新興國家生意，應堅持最高商業標準同道德，唔好行賄，而新興國家公司管理層則就應該睇緊啲，唔好俾員工受賄，事關貪污呢家嘢，要兩頭睇緊至有效喎。