金融沙皇任志剛9月底退休，隨着任總步下台階，一個年代便畫上句號，俗語云「江山代有才人出，各領風騷五百年」，有人漏夜趕科場，自然有人辭官歸故里，華華聽聞，繼早前該局元老、現年55歲嘅副總裁蔡耀君選擇年底前提早退休後，任職該局14年嘅另一元老、傳訊總監陳民傑（圖）亦已請辭，與任志剛雙雙喺下月底離任。
難怪昨日告別記者會，任總亦親切宣佈由總監陳民傑主持，一場「志雲飯局」，台前幕後送別兩人，令跑開財經新聞嘅記者，回想過去，難免欷歔。
下月底雙雙離任
年僅41歲嘅Thomas（陳之洋名），喺電視機前嘅朋友應該唔會對佢陌生，因為每朝任總喺中環國金中心「志剛廣場」升旗──接受傳媒提問時，正係由佢伴隨左右。據聞喺任總麾下經歷兩次世紀金融風暴後嘅Thomas，亦深感市場無常，辭職後將會進修增值，日後不排除江湖再見咁話。