昨天講過，選擇同一隻股份談戀愛，要熟知管理層底蘊呢個老生常談，今日研究有星級大股東撐，係咪就能夠造就五星級股價。
一般新股上市前，保薦人為求谷反應，都絞盡腦汁喺招股書以外，提供「亮點」畀傳媒大做文章。自從少咗本土大孖沙瞓身入飛支持，焦點轉移至內地基金大戶，甚至公司背後的星級股東。
7月上市的琥珀能源（090），有新能源概念，仲有內地「農王」魯冠球之子魯偉鼎做大股東，掛牌首日急升63%，成為今年新股升幅王。近日接獲唔少家庭觀眾質詢，話坐晒艇點算好，與其坐喺度諗，不如了解多啲買咗乜。
先講基本因素，琥珀喺內地有3間燃氣電廠，最大賣點係全部用天然氣發電，加上同供應商Friend底，一簽就係20年供氣合約。過去幾年天然氣價雖波動，佔公司營運成本相對穩定。睇番內地目前天然氣價只係國際原油價格一半，喺「減煤增氣」國策扶持下，公司經營環境靚靚。
琥珀係魯偉鼎接棒試金石
再講股價，喺炒過龍後高位最多下調咗30%先回穩，嚇到散戶雞飛狗走，但大股東魯偉鼎透過琥珀國際手持75%貨源，定過抬油，因內地有更大的業務等佢發落，就係製造業58強的萬向集團，亦係著名房地產開發商之一。
萬向係佢老竇魯冠球喺69年一手創立，以汽車零部件發迹，幫美國通用汽車做代工生產，係改革開放前，首間大規模走出去嘅中國企業。
成功發展為零部件一哥，眼看行業已屆強弩之末，魯冠球即時轉型大搞農業，短短十年間，旗下萬向德農已成為內地種業龍頭，玉米種銷量佔全國10%，保持市佔率第一。佢相信「農業投資回報很晚，但很巨大」。
身為實務工業家，魯冠球唔信高深的大學教育對做生意有用，阿仔魯偉鼎高中未畢業，就被送往新加坡學企管，20歲出頭已接任副總裁，由94年起，一直幫阿爸打江山。
跟好多白手興家富豪一樣，魯冠球雖屆花甲之年，仍未肯全身而退，都係要睇吓阿仔有無自己咁好眼光。要守業，再論創業，守業一關過咗，阿仔喺04年創立琥珀國際，相信亦係佢能否接棒的試金石。阿爸咁掂，點會畀個仔失威呢？
胡孟青