民建聯稍後見煲呔發表對今年施政報告意見，未應酬煲呔前，噚日先公佈一個市民對施政報告期望民調結果。雖然煲呔講明今年唔再派糖，不過民意唔係咁睇，民建聯民調就發現有43.5%市民覺得政府要繼續派糖，有31.2%則話唔使派，民建聯形容呢三成一人係「好顯著嘅數目」，多數要服從少數，所以即使有四成三人想政府派糖，政府都唔應該屈服。
三成人被當透明
同一個民調有另一組有趣數字，同樣有31.2%受訪市民贊成堅持2012年落實雙普選，有43%人唔贊成，呢個時候，民記即時表演拿手好戲──轉軚、變臉。葉國謙不惜打倒幾秒前的我，呢次就話少數要服從多數，指43%人反對2012雙普選嘅市民係「好顯著數目」，所以政改一定要循序漸進，堅持2012雙普選嗰三成一人變成透明。
官字兩個口講完可以唔認數，民建聯得一個口，道行原來仲高，咁樣演繹民調數據，邏輯顛倒混亂，聽到記者頭都暈。其實唔想香港咁快有民主坦白啲講咪得囉，使乜燒錢搞民調吖。