父親是家庭及子女中心，但坊間從來將父親形象定位為威武寡言，難和子女親近。耀中國際學校校長（語藝教育）歐偉民（Dannis）認為子女出自母親懷胎十月，感情血濃於水，父親要倍加把勁才得和子女融洽相處。Dannis大女綽琳今年6歲，自她約一歲開始，就將她當作Mini版女朋友，自有一套湊仔經奪取女兒芳心。
記者：林佩婷
攝影：王文忠
80招愛的表達
其實父親可有很多方式和子女相處，但Dannis偏偏要當綽琳是Q版女朋友?!原因好簡單，女兒性格或多或少跟太太相似，Dannis認為當年追到太太，現花點心思都應該能奪女兒歡心，建立良好親子關係。「試諗吓以前拍拖即使公司幾忙幾辛苦都好，每次見佢個心都好期待，我就係用呢個心態去對囡囡。」最終他自訂80招來表達對女兒的愛，例如留愛的小字條、見面擁抱、叫小寶貝等親密外號等。由那時開始，綽琳就變成Mini版女朋友，兩人相處也越來越順暢。問到追太太還是囡囡辛苦一點，他笑笑口道：「咁梗係太太啦，當年我要諗計突圍而出，但囡囡一出世就係我女友，唔驚有競爭。」
愛而不寵
通常男朋友要奪得女友芳心，必定百般遷就，難道Dannis不怕寵壞綽琳？「多年教育經驗令我學到點同小朋友相處：以爹哋形象作為框框，而心態就係男友。好似我會用『你』、『我』強調個體，平起平坐同子女傾偈。最重要係做到三點：愛而不寵，不想女兒有公主病，就要設下底線。切忌管而不教，只知懲罰而不知如何教，只會令子女遠離。最後就係同佢哋建立愛的家庭。」
和女友相處，讚美決不可少，同樣道理，子女亦渴望父母的讚賞。可惜中國人傳統對此比較吝嗇，Dannis認為要有技巧地讚美小女友，空泛的語言只會令孩子無所適從。「好多父母只會從學業上讚仔女，我就覺得咩都可以讚，但就要具體。例如今日綽琳自己揀髮夾紮辮，我就會讚佢紮得好平均，個髮夾同件衫好襯等等。」
3歲學揸刀
好多時跟孩子對談，大人都會用BB語，Dannis則反其道而行，由細到大都跟綽琳作成人對話，到兩歲時候，即使長長的句語，綽琳也聽得明白。這不但有助溝通，也訓練她的語文能力。最令人驚奇是他們肯讓女兒嘗試，不因年紀小樣樣限制。「有啲父母好驚仔女拎刀，但綽琳3歲就畀佢拎刀學煮食、又或喺公園泥地玩。其實只要父母在旁小心啲就無問題，樣樣限制子女只會令佢唔敢去試，所以要由細建立自信心。」既為校長，自有一套過人教育法，查實綽琳還有一弟一妹，3個月大的妹妹太小，歲幾的弟弟正適齡教育，今番Dannis滿腹「朋友」大計，成效如何便有待時間印證。
1.Dannis跟囡囡綽琳齊齊吹泡泡，此乃80招愛的表達之一。
2.自細一見囡囡抹梳化就讚美她，增女兒家庭歸屬感。
3.綽琳3歲已學揸刀煮食，有板有眼。
校長貼士 面試重軟件
Dannis貴為校長，當然要問問家長最緊張的入學面試。「一般家長較着重訓練孩子硬件，即語言、記憶力同應試技巧。但其實學校更注重軟能力，即表達力、合群度。與其狂谷子女對答，不如讓幼稚園子女多去朋友屋企玩，學習與人相處。至於面試小學傾向問家長，睇吓大家理念相唔相同，所以家長要揀和自己理念一致的學校，再看孩子應對。」
