騰訊（700）唔經唔覺已升到近百二蚊樓上，又係董事嗗水嘅時候。上星期總裁劉熾平（圖）同埋執行董事張志東，一齊喺禮拜四同禮拜五分別減持20萬及75萬股，兩人夾埋套現成1.08億元。
兩人共套現逾億
兩人嘅沽售價介乎112.6至114.9元，同前日騰訊收報120元嘅高位都爭啲，但其實兩位都算眼光唔錯，睇噚日騰訊股價跌1.33%，收市報118.4蚊，再睇睇大市應該會回一回，兩位絕對係高位走貨。賣完後劉總同張志東仍分別持有1080.36萬股及7150萬股。
咁如果騰訊真係好似某啲分析員咁講，有力上200蚊又點呢？唔會揼心嘅，反正呢隻騰訊係咁多隻科網股之中最「估佢唔到」嘅一隻，初初上市升到廿蚊，好多人都走唔切，再留低博一博嗰啲，50蚊嗰陣就閃埋，真正留守到一百大關嗰啲，華華成日覺得好可能係主席馬化騰自己同埋佢啲同事，如是者咪大家高位賣吓，低位買番，又幾奇呢又？