有一種長龍，不在繁忙時間出現，專揀在飯後甚至深宵時分才現身。這種就是甜品店，飽餐一頓後，沒甚麼比一啖透心凉的棉花冰或豆腐花更好！
記者︰黃家欣
攝影︰譚盈傑
模特兒︰Kitty@PureModels
頂級巨峰棉花冰
今年夏天特別翳熱，掀起一片食冰潮，台式棉花冰檔開到成巷成市，當中開業兩個多月的糖仁街，雖然未有短時間內開枝散葉，不過卻以高級食材製作特色口味的棉花冰打響名堂，吸引一眾嗜冰者入夜後來門口排隊，即使街頭熱辣辣仍有逾十多人輪候。老闆任生與太太開店前到過台灣一間四十多年歷史的刨冰店取經，又專程在當地購入特製刨冰機，做出來的棉花冰特別綿稠，亦溶得較慢，而且採用鮮果製作刨冰，更不惜工本，以貴價的巨峰提子、日本水蜜桃、法國頂級Valrhona朱古力等作材料，亦不會偷工減料，鮮果與冰份量一比一，味道特別天然馥郁，無添加任何人工調味，即使價錢比坊間的刨冰略貴，依然不乏識食的捧場客。
薑汁豆腐花冰$28
以豆漿撞入薑汁後，製作成冰柱後，再刨成薄片，入口一陣醒神的薑味，豆味濃郁，餘香陣陣。
宇治金時$36
傳統日式口味，以日本抹茶粉開成的綠茶棉花冰，茶味香濃，清中帶香。
Valrhona雪山$40
人氣爆燈的朱古力雪山，採用頂級法國名牌Valrhona朱古力做，可可味香而濃郁。
葡萄之戀$45
以當造的巨峰提子與香甜的水蜜桃刨成雙色冰，入口相當香甜，果味濃郁，淡淡清香，而且冰片刨得綿稠細密，質地像雪糕，富奶香。
糖仁街（23684118）
尖沙嘴厚福街11號地下
榴槤專家越做越大
甜姨姨是天后名店，以前細舖只有數張桌椅，經常爆滿，要擺到出街才可應付一眾擁躉，兩月前終於搬往大舖，面積大為擴充，可容納約三十人，不過一到入夜，場面依然熱鬧，門外經常有等位及外賣人潮，連門外的吸煙座亦佔據，繁忙時間如星期五、六，10時後平均等候約15-20分鐘。甜姨姨不時有新口味推出，之前創作出榴槤雪沙叫好叫座，今次則以新鮮榴槤肉，與忌廉及蛋黃打成綿稠的mousse，質地極為軟滑，入口榴槤味道澎湃，香甜濃郁，伴以新鮮果肉，雙重口感。甜姨姨有多款自創榴槤甜品，均很受歡迎，每日更會用上四十多個榴槤，而每款甜品均是甜姨姨用心製作，每天以人手將新鮮水果去皮拆肉，所以產量不多，更顯得珍貴。
即撞木桶豆腐花$20
每桶豆腐花都是即叫即做，將滾熱的豆漿撞入放有石膏粉的木桶，效果幼滑，新鮮熱辣，豆味香濃。
芝麻豆腐西米露$20
芝麻炒香研碎後放入西米露，再將豆腐打碎放入，入口有啖啖豆腐渣，豆香四溢，伴一口芝麻雪糕同吃，口感軟滑。
龍眼甘露$25
以新鮮龍眼拆肉榨汁，控制冷藏溫度令龍眼汁凝固成冰，不經打鑿刨製，味道特別濃郁，加有柚子肉口味清新。
榴槤奶凍$28
以忌廉、蛋黃及榴槤肉打成mousse，口感超軟滑，果味濃郁，榴槤fans要試。
甜姨姨（25086962）
天后清風街13號地下
