近日喺上海拍攝緊《葉問2》嘅甄子丹，日前接受美國《紐約時報》訪問，大爆息影計劃。佢話從影咁多年應該有個終結，仲為自己定下50歲、即係2013年嘅息影計劃，數數手指，得番四年咋喎。甄子丹話想畀多啲時間屋企人，不過佢話息影唔代表退休，因為佢想做動作片導演。另外，甄子丹入行咁多年，始終活喺成龍同李連杰嘅陰影下，舊年佢擔正《葉問》仲提名金像獎影帝，令佢有吐氣揚眉嘅感覺。