今夏做足大龍鳳嘅西甲球會皇家馬德里，周一喺主場大炒「頂包」嘅對手洛辛堡4:0，捧走巴拿比奴盃，係威係勢咁。其實成個夏天講咗皇馬咁耐，又知佢哋簽入卡卡、基斯坦奴朗拿度（C朗）後隊波有幾好睇，但到目前為止，我哋香港球迷仲未知邊度有得播西甲，齋聽新聞點滿足呀？
4:0大炒洛辛堡捧盃
我求大俠就好鬼主動，事關西甲本周就開鑼，直播嘅嘢梗係關注啲；於是走去同now、有線聯絡，點知兩台嘅發言人齊齊同我講：「暫時未有消息公佈喎，連西甲發行商到家都未通知我哋，答唔到你有冇電視直播住。」吓？西甲仲有幾日就殺埋身喇，唔好逼我哋上網睇啲畫面唔清、有時仲會講阿拉伯文嘅直播好冇？唔該兩間電視台快啲幫幫手搞掂佢啦！
講番周一場波，話洛辛堡係「頂包」對手，皆因原本皇馬係對AC米蘭，而唔係呢支挪超球隊，點知最後AC冇期臨時甩底。其實咁咪仲好，皇馬搵次幾級嘅洛辛堡祭旗，開季前最後大勝番一場，振奮吓士氣都好嘛。結果憑新兵賓施馬梅開二度，加埋狄亞拉同魯爾嘅入波，大炒對手4:0賀一賀佢，連贏5場友賽。
沙加度告別雲佬復出
老實講，呢場巴拿比奴盃都意義重大o架，係效力咗球會10年嘅沙加度告別戰；呢位33歲右閘嚟緊就會加盟布力般，今場佢着住老西冇份踢，但賽前就得到每位隊友嘅祝福與擁抱，同在場8萬名球迷嘅歡送聲，場面感人到連沙加度都忍唔住流下男兒淚。
老將走，新星來，巴拿比奴球迷見到有卡卡、C朗、沙比阿朗素同賓施馬等人入場，球迷又即時嗌破喉嚨。巴拿比奴盃第2個高潮位出現喺75分鐘，養傷292日後復出嘅雲尼斯達萊，終於後備入替卡卡，呢位荷蘭射手身形依然好fito架！