有時真係唔好唔信邪，正所謂唔怕生壞命，最怕改壞名，大玩本土文化嘅家品店住好啲（G.O.D.）老闆楊志超，年幾前喺銅鑼灣怡和街搞咗間非一般商場DelayNoMall，路人經過日又delay，夜又delay，個場今個月初終於nomore，靜雞雞拉閘。
月租市值約35萬
楊老闆數口好精，唔做商場改做二房東，將地下連一樓近兩萬平方呎樓面，全部轉租台灣過江龍食店鼎泰豐賣小籠包。楊生噚日唔肯透露收幾錢租，只係話收租金額好吸引。巿場消息就話，個場月租要成35萬元，楊老闆印印腳有錢收，除笨有精。尖沙嘴鼎泰豐負責人話，銅鑼灣新店正在裝修，希望年底前開張。
DelayNoMall做極唔起，楊志超話死因唔關個名事，而係商場門口少咗條斑馬線，加上金融海嘯影響消費意欲。
楊志超曾建議鼎泰豐沿用DelayNoMall個名，但對方拒絕。吓！「DelayNoMall鼎泰豐」，你估人哋嫌錢腥咩！