今年3月一名尼泊爾男子喺何文田俾差人射殺，輿論批評警方唔識點同少數族裔打交道。為顯示警隊重視同少數族裔人士溝通，噚晚喺九龍公園有場七人足球賽，油尖警區警員同尼泊爾足球隊踢咗場「和諧波」。
唔知點解，警察上半場好客氣，半場淨吞四蛋，下半場雙方交換球員先至叫做互有攻守，呢場球賽「河蟹」橫行，最重要係搞好警民關係，賽果？梗係和氣收場啦。撮合雙方作賽嘅香港善導會社工袁姑娘話，好多土生土長尼泊爾人已融入社區，如果日後同警方多溝通，相信唔會再有誤會。佢又話上次單案後，雙方關係惡劣，所以呢場波意義重大。油尖警區副指揮官劉保祿出席開球禮，總督察馮偉明換好波衫，在場邊吶喊打氣。