午飯時刻，股票M見到鑽石L在座，立即問：「有冇兩卡DEF呀？」左丁山只知道兩卡係指鑽石兩卡（carat）咁大，至於DEF係乜，烏垂垂。做人唔怕做大鄉里，最緊要識問，於是立即問鑽石L：「何謂DEF？」鑽石L笑笑口答：「卡就係重量，D指成色，百分百純色，E即九九，F係九八，D梗係貴啲啦。自己人用，用F夠照嘞，便宜啲o架。」何謂自己人？鑽石L話：「嗱，買畀老婆咪用F囉！」哦，明白嘞，公仔唔使畫出腸。
股票M又有要求：「係老婆話要買o架，講明要VVS㖭。」鑽石L又向左丁山解釋：「VVS就係veryveryslightlyimperfect，最高級係internallyflawless（無瑕疵），低一級有VS，即veryslightly，分VS1、VS2兩級，然後到slightlyimperfect亦係有兩級。呢啲級數係美國寶石學會（GIA）訂定嘅。屬世界鑽石共同語言。」兩卡D加VVS，咪要好貴？鑽石L話：「仲要講埋車工（cutting）標準㖭，消費者若要跟足GIA鑑證，樣樣要最好，當然要畀好多錢，而且未必有咁靚嘅石㖭，只會中東富豪先至會要求各方面全部完美，家都有一啲內地客係咁要求高嘅。」究竟要幾多錢，鑽石L話好難一概而論，每粒石都唔同，但可以講，金融海嘯嘅效果已全部消失，靚鑽石價錢已經恢復海嘯前價錢，價格急升。以一般用家最喜歡嘅乾淨企理貨而論，即兩卡F兼VVS，要三十幾四十萬港元左右，呢類鑽石如果唔用顯微鏡睇，睇唔到花度嘅，夠晒威咯；一卡裝，十萬元以下嘅石，買一卡F夠嘅嘞（約六至七萬元）。
買鑽石，無錢莫問，鑽石L話現在消費者講究知情權，樣樣要跟GIA標準，於是GIA推出好多準則，鑽石商人搵寶石師鑑定，因評級標準差一級，價錢相差甚大，於是作弊嘅誘因無時不在，間中就會發生賄賂貪污案了。
既然問開，貪口爽問埋倫敦大盜搶劫名店Graff，得鑽石首飾千餘件，外電竟然傳出話有可能流傳至香港脫手，究竟是否可信？鑽石L話：「聲東擊西至真，邊會嚟香港吖。過往呢類賊贓多數係流入中東嘅，一來好難查，二來中東先至有錢買！」