出爐港姐冠軍劉倩婷的是非冇時停，前日她否認整容傳聞，又謂自己不是MJ，結果遭網民怒插她對死者不尊重，無綫昨亦承認其說話不恰當，會提醒她日後慎言。另外，有爆料者指劉母為幫女兒摘冠擺陣吸陽氣，劉母昨大為激動發毒誓說：「如果有咁做，就冇仔送終！」
劉倩婷的港姐后冠堆滿是非，她由參選至今有關其斷背、隆胸及整容等是非不絕。前日她曾公開否認整容傳言：「你估我MichaelJackson咩，全身都冇整過，原裝正版。」但其MJ論一出即惹來大批網民狂插，指摘她身為代表香港的港姐冠軍，公開評論死者既失言也不尊重。
「要顧及港姐形象」
無綫外事部副總監曾醒明昨表示，相信劉倩婷的MJ論是無心之失，但承認其說話不當，曾醒明稱：「佢嘅身份係香港小姐，要顧及港姐形象，佢嘅說話唔係太恰當，唔好對過身嘅人有評論，我哋會提醒佢慎言，注意說話用詞。」
除了失言惹風雨外，劉倩婷昨日繼續被爆料。有讀者電郵大爆劉母為助女兒轉運奪獎，聽從玄學師傅之言，於自資的上環茶餐廳內佈陣吸陽氣，指她突於港姐決賽當晚，宴請亡夫的多位男友人到茶餐廳食飯，但她卻往場館睇女兒出賽，令該班友人白等一場兼自付飯錢。
昨日記者到訪劉母的茶餐廳，其店外放滿花籃，店內玻璃則貼滿女兒的得獎剪報。對於被指擺陣助女兒轉運，劉母說：「你睇吓我間舖頭，邊度有擺降頭風水嘢，招財貓就有一隻。」傳她設宴缺席，她則說：「嗰晚嚟嘅係我先夫車會嘅朋友，有男人有女人亦有一家大細。個女參選，好多uncle、auntie撐佢，我冇咁多飛，佢哋就約埋喺茶餐廳睇電視撐啫。」
講到劉倩婷兩母女是非多時，劉母就越講越激動：「講我唔緊要，但個女得嗰23歲，成日咁樣講佢，做阿媽嘅好唔開心。個女仲同我講對唔住，因為影響到我，佢都好唔開心，仲喊！」有兒有女的劉母更即場發毒誓：「如果我有咁做，落降頭、搶人老公，我就冇仔送終！」
細佬戴后冠拍照
獲母親力撐的劉倩婷昨如常出席公開活動，與亞軍李姿敏及季軍熊穎詩到商台接受訪問，劉倩婷稱會把后冠送給母親，她說：「我哋一齊分享呢份禮物，連細佬都着住睡衣、戴后冠擺幾個港姐甫士影相。」對於港姐決賽收視破8年新低，劉倩婷認為與港姐質素無關，又稱觀眾可能於網上收看才影響收視。
採訪、攝影：黃文偉、葉雪、王連連
