內地三大電訊商為3G爭崩頭，打減價戰，單係搞內鬥都元氣大傷，反而坐享漁人之利嘅係3G技術的幕後功臣，特別係HTC。
作為國產3G制式TD-SCDMA代表，中移動（941）唔想俾蘋果㩒住嚟搶，早前已同大家介紹過佢嘅網上商店，問題係未有具代表性嘅手機支援。啱啱佢就夥拍台灣HTC開發自家品牌手機，有咗呢個秘密武器，即時令人對中移動嘅3G加番唔少分數。
用過HTC智能手機Magic，都會發現手機體驗同iPhone差唔得太遠，但價錢就相對大眾化得多。而新出的HERO，更兼顧埋外表設計，潮味十足都只係四千零蚊。目前美國每6部智能手機，就有1部係HTC以OEM模式幫Palm同Verizon生產。直至同Google合作用Android系統，HTC更上一層樓，成功孕育出中移動呢隻金蛋，未來要同蘋果爭一日之長短，只係時間問題。
HTC左右逢源
HTC的成功，亦打造咗創辦人王雪紅為寶島女首富。據福布斯估計，她同丈夫的資產合計高達160億元。雖然HTC無上市，但睇番佢喺90年代一手創立，一度被喻為中國Intel嘅威盛電子，2000年科網熱炒到天價每股629元新台幣（現價約13元新台幣），就知呢位寶島女超人魅力非凡。
低調的女超人鮮有曝光，較為人熟識的是她已故父親「經營之神」王永慶。王氏有3房人共9名子女，王雪紅為二房所生，原本打算做音樂家，後來揀咗喺加州大學主修經濟。97年HTC成立初期，王雪紅夫婦唔靠父蔭，自己打江山，原本做手提電腦，但市場競爭激烈令公司增長緩慢，索性孤注一擲轉做手機，結果又俾佢殺出一條血路，泊到微軟碼頭。亦因為咁，王同蓋茨識於微時做咗Friend，每年都會飛去美國一次同佢食吓飯，傾吓生意。
左右逢源，一邊有Google，另一邊有微軟，點會唔收錢收到手軟？
長線持有一隻股票，就等於向管理層投下信心一票，無論經濟係順流逆流，都希望公司腳踏實地，因時制宜為股東創造價值。觀乎一些只懂追求盈利的公司，市況順時賺個天下無敵，但遇上困境就無能為力，美國金融股的興衰就是最佳例子。要買得安心，跌價都瞓得着，係咪時候重新檢視吓手上投資組合，邊啲係人，邊啲係鬼？
胡孟青