中石化（386）董事長蘇樹林日前話過，今個月18號大股東中石化集團用75億美金買瑞士油企Addax嘅大刁已完成，一副滿意模樣，殊不知經已「唔覺意」得罪咗世界第三大產油國伊拉克政府。
周一伊拉克政府就佢哋第二批油氣項目即將推出招標開記者會，佢哋石油部副部長自爆，話已致函中石化集團，問佢哋係唔係買咗Addax？如果係，就會將佢哋列入黑名單，禁止再參加伊拉克油田招標！咁究竟Addax有乜得罪佢哋？
據副部長話，原來包括Addax等幾間外資油公司，無視伊政府反對，同庫爾德地區政府簽咗幾個石油協議，作為什葉派嘅伊拉克中央政府認為，呢啲協議係非法嘅，但庫爾德地區政府就認為合法。家中石化集團都未回應，可能蘇樹林要同外交部討論吓點搞至得。