好多大價股呢輪表現可謂超晒標，呢類大價股特點，就係散戶如肯長線持有，一直閉起雙眼唔好理咁多，到某一日再睇，就會發覺股價升幅好驚人，隨便舉例子就有騰訊控股（700）及恒安國際（1044）。
呢類大價股上市之時，股價通常係個位數字，不過升途開始後，股價越升越有，呢種力量明顯係基金長線坐貨先至有。
至於升浪途中有冇散戶炒過？肯定有，但一路係咁升，獲利誘惑越來越大，升到某個階段，散戶就因賬面獲利豐厚而忍唔住食糊。基金大戶要食大茶飯，則一路坐住貨唔沽。星俠在股場炒作咁耐，未聽聞有散戶由始至終持有呢類大價股，到家陣仲未沽。
等大跌市買貨
東方電機（1072）亦係上述之流，當年上市不過幾蚊貨仔，07年最高曾升至80元水平，之後雖曾跌至10元邊緣，但牛市一到，升幅令人意想不到。
該股昨逆市升6.2%，報42.40元，呢隻股份係長線投資之選，最好等大跌市時買貨，高追則不宜。
方星俠