上海市長韓正接受彭博通訊社訪問，講明要與香港爭做金融中心，但又表明上海目前嘅金融產業與香港相差太遠，追都有排追，而且有三大難題，其一是法律與司法制度，其二是人民幣尚未自由兌換，其三是金融人才未夠多，香港有二十三萬人從事金融性質嘅工作，而上海只有兩萬幾人。最妙嘅，就係韓正毫不掩飾咁講：銀行家係商界人士中，最冇良心之人。既然係咁，共產黨人點解要與西方資本主義核心人物打交道呀？見錢開眼乎？左丁山以前曾在本欄寫過：美國銀行三藩市辦公大樓（即以前總部）外有一件大型塑像，就係一個黑色心臟。講心唔講金嘅賓架，好容易導致銀行因呆壞賬太多而倒閉。
韓正有此言論，唔怪得Prof.Dr.NorbertWalter話上海唔好同香港爭鋒咯。唔知係唔係因為退休前發言呢，和達博士講嘢十分率直，全不用外交口吻。佢提到金磚四國（BRIC），嗤之以鼻，認為四國毫無相通之處，中國印度可以勉強拉埋一齊，但俄羅斯巴西與中印差天共地，聯成一氣簡直係笑話。博士話：現在人人話巴西有前途，其實，在我出世之日，人人都講到巴西好有前途，巴西乜都有，地大物博，資源豐富，應該前途無限，但我可以講，到我離開人世之日，巴西仍然係一個人人都話有前途嘅國家。博士嘅意思係，巴西只係得個講字，原因係乜？在博士眼中，一個國家有好多lazyyoungmen，如何發展？聖保羅係一個大城市，人口一千五百萬人，但聖保羅只得一個細得可憐嘅機場，可見其餘。
博士對俄羅斯亦唔客氣，指出俄羅斯人口老化，不願生育，男人鍾意飲酒，女人行為追貼男人，博士唔睇好俄國長遠發展。哈，博士反而稱讚香港噃（唔知係唔係因為在香港演講，要捧香港人呢？）佢話香港十分先進，有一流金融業，假如香港嘅高等教育界不斷進步，培育金融人才，就係亞洲時間區（timezone）內最適合做金融中心。博士指香港教育界專門為美國長春藤名校輸送學生，照佢睇，香港嘅大學應該以成為長春藤為目標，爭取人哋嘅精英來港先至啱。