中電（002）噚日宣佈，旗下中華電力常務董事阮蘇少湄（圖）申請休假治病，原因係她經診斷後，發現患上早期乳癌，要接受治療。阮太休假期間，由營運總裁藍凌志兼任署理常務董事一職，而企業發展總監陳紹雄就負責集團核心業務。集團相信阮太暫停職務，唔會影響公司運作。
近年政府經常宣傳，呼籲女性小心乳癌，華華問過臨床腫瘤科專科醫生岑信棠，佢話乳癌係本港女性最常見癌病，患病原因同生活習慣有莫大關係，例如經常進食多肉多脂肪嘅食物。不過佢話，大部份患者發病時都屬初期，且有多種方法醫治，死亡率唔算高，但就話50歲以上女性，應該每年至少做一次乳房造影檢查，仲要定期喺月經來前嘅時間以手按吓胸部，檢查係咪有硬塊。華華在此希望阮太早日康復。