港股走勢梅花間竹，上周五日跌升跌升跌，噚日又轉升，恒指升336點，收報20535，期指更大升404點，又由低水變番高水。
除上周三大市曾略為跌穿2萬大關外，基本上恒指在過去一個月都係在2萬至21200間上落，噚日又重上10日線（20472）之上，在20日線（20529）水平爭持。大市可上可落，過度看好和看淡都不宜，到大市確認衝破上阻力或下支持後，才有機會出現單邊走勢。
坦白講，現時大市看淡者佔多數，人人都等跌市出現時買貨，但個人觀察所得，基金同大戶在現水平仍係密密在收集，畀佢哋收收吓，好多大價股都畀佢哋收乾，到時機配合時，佢哋就會「操」上去，到大多數人忍唔住，再度入市之時，新升浪就會再度展開，恒指可上衝23000點，甚至樂觀估計可見25000點。今個禮拜期指結算，大市走勢會較為飄忽，下禮拜走勢會轉明朗化。
資本策略（497）吐氣揚眉，在大升榜排13位，高收0.255元，升3.9仙，升幅18%，成交1.48億股。6月20日曾作推介，當時股價0.176元，睇0.266元，噚日最高價0.26元，係今年新高。由6月初開始，資策走勢形成一個大圓底，近日造完支「柄」，即發力上衝，照度上去，有機會見0.33元。
本月6日，推介黃金集團（1031），當時股價0.211元，話佢有異動，果然在月中就飆升到0.375元，8日內升咗77%，之後出現正常調整，落到0.275元，噚日升勢再起，高收0.32元，升3仙，升幅10.3%。黃金集團走勢在高位形成下降楔形，若有大成交配合而升破0.34元的降軌阻力，最小量度升幅目標係0.51元。
預測PE僅5.3倍
亨泰（197）亦有異動，搶上0.43元高收，大升4仙，升幅10.2%，成交亦大增到7200多萬股，一個大型上升裂口，升破10日、20日同50日3條平均線，並重上保歷加中軸之上，MACD日內亦會出現「雙牛」入貨訊號，一確認升穿0.435元的下降軌阻力，大升浪將會展開，初步可以0.80元為目標。
亨泰係受惠中央振興經濟的內地消費股，過去年度（09年6月結）盈利估約1.4億元，現年度可上升到2億元，每股盈利8仙，預測PE只係5.3倍。
郭兆誠