兜兜轉轉，本港商人楊家誠（Carson）終於有機會成為本港首名英超球會班主，名正言順駕馭英超升降機伯明翰。噚日Carson楊搞咗場記招，將兩年多嘅內心抑壓一炮過爆發﹗
咁又難怪，Carson楊旗下泓鋒國際（2309）兩年前揼本千五萬英鎊，買入伯明翰29.9%股權，點知被人質疑佢冇錢做全面收購，又唔畀佢參與球會日常運作，搞到不歡而散。
不過，有錢使得鬼推磨，畀得起錢就係老闆；回想從前人家話嫁唔嫁，扭扭擰擰，Carson噚日即刻衝口而出：「其實一路都想買（全購伯明翰），但係你知啦啲英國人，er……」之後全場deadair咗四秒，差啲連烏蠅飛過都聽到，跟手佢即刻笑笑口補番句：「咁我哋梗係有啲保留啦﹗」
暗示英國人阻買球隊
咁英國人即係有乜特性呢？Carson「代言人」、泓鋒首席執行官余懷英從旁「教」答，大家文化唔同，理想又唔同囉！不過，直腸直肚嘅Carson亦不忘發表己見：「唔係你叫我買就買，我準備買就買，你逼我都無用。」佢又估計，絕大部份泓鋒小股東會好支持供股全購伯明翰咁話。
Carson楊又話，喺九月底轉會市場結束前，打算私人科水400萬至500萬英鎊增強球隊實力，買乜人已經有心水，希望今個賽季可留守中游位置，明年有錢賺。
九月轉會市場完結？睇嚟Carson楊要補吓課先得，英超球員轉會市場下周一就完結。希望Carson楊只係因為搞供股，忙到頭昏腦脹，口快快講錯，如果唔係九月佢畀幾多錢領隊都冇用。
李華華
mailto:[email protected]