湯盈盈前晚錄影無綫節目，早前有傳錢嘉樂因不喜歡她貪玩的性格而提出分手，同時傳出嘉樂翻啅舊愛李珊珊，但珊珊卻與嘉樂劃清界線，表示要顧及他另一半的感受，問盈盈珊珊所指的另一半是否她時，她笑笑口說：「未必係我呢！」
湯盈盈、陳偉霆、陳茵媺、古巨基、薛凱琪、鄭融和周柏豪等，前晚到將軍澳電視廣播城錄影《動畫金曲音樂會》，有人扮鬼扮馬以卡通人物造型出現，其中以周柏豪的花倫同學最為神似，鄭融則扮《IQ博士》的草菇，她說：「原本諗住踩架單車仔出場，但我對腳太長踩唔到。」記者聞言指她自稱腳長，她即笑說：「我第一次咁講咋，所以今日都不停咁講。」
決不生BB
演繹《我們這一家》主題曲的盈盈，提到錢嘉樂前女友李珊珊日前表示要和嘉樂劃清界線，盈盈聞言笑說：「吓，係咩，唔係嘅，唔知呀。」再提到珊珊解釋因要顧及嘉樂另一半的感受，所以不便講太多，記者問珊珊所指的另一半是否盈盈時，她笑笑口說：「未必係我呢，唔知，你哋幫我諗答案。」
盈盈直言可以和前男友繼續做朋友，甚至試過跟前男友及他的老婆和BB一同吃飯，全無芥蒂。至於會否閃電結婚？她表示成數不大，因她心目中希望結婚典禮是一個大派對，因此必定要花時間準備，她更直言雖然鍾意BB，但因責任重大不會考慮當母親。
古Sir任主持
此外，古巨基以古Sir造型擔任主持，問近日頻頻為無綫工作，會否擔心被傳為年尾頒獎禮獎項鋪路？他說：「你唔問咪冇人講？我做今年兒童節大使，一早講咗會做呢個音樂會主持，因為古Sir啱做，其實好多歌星都幫TVB做嘢。」張敬軒也透露將會推出教小朋友說普通話的CD，相信甚有市場潛力。
採訪：馬建華
攝影：葉君海
