最靚港姐朱玲玲日前重登港姐舞台，唔少觀眾大讚佢靚過當屆港姐多多聲，keep得好到痹。朱玲玲前夫霍震霆同現任夫婿羅康瑞，咁啱噚日都有出席煲呔嘅施政報告政協諮詢會，據政府總部小道消息話，兩人共處一室開會長達粒半鐘，但會上絕對係「零交流」。
小霍窒三秒
會後，小霍因為東亞運火炬傳送終點呢鑊嘢，一出嚟就俾傳媒圍攻，有眼利嘅記者卻到，喺小霍後面經過嘅羅公子微微笑住口，想趁大家唔覺唔覺走咗去。但有行家即時決定「棄霍保羅」，追問羅生有冇睇港姐，又問佢會上有冇嘢同霍生講等，但羅生均以「冇嘢講」三粒字回應。小霍亦被問到會上有冇同羅生交流，佢當場窒咗三秒，再定一定神答話：「我只講施政報告。」就跳上車離開。
今年港姐質素麻麻，唔少網民電車男鬧到飛起，嚟參加諮詢會嘅汪阿姐被問到今屆港姐係咪質素差時，居然話：「我冇睇喎！」同場出席嘅政協郭炳湘就有啲黑仔，原本想問前海問題，但因為未被抽中，惟有遲啲再搵機會問番煲呔。