黃油蟹未到港，河蟹曾搶先令市民食指大動，唔少人都諗緊點炮製佢，或者試吓和諧式烹調法係咪真係sogood。公民黨黨魁余若薇係炮製河蟹曾嘅大廚之一，余大狀對於曾德成局長涉嫌打壓女青年會社工謝世傑非常眼火爆，噚日開始喺facebook發起「一人一信」行動，呼籲市民致函煲呔要求成立法定委員會徹查事件，晚上已有200幾人加入。
余大狀其實唔係未畀過機會河蟹曾解畫，可惜佢兩次回信都處處迴避。既然係咁，惟有叫煲呔出手，查吓究竟有冇人向受資助機構施壓，以及社工協助居民申訴係咪代表唔和諧囉。此外，大澳居民關注組、職工盟等24個團體加入咗新成立嘅「抗河蟹大聯盟」，聽日開記招聲討河蟹官員。