早排高盛被紐約州總檢察長抨擊大花筒，舊年金融海嘯下大派花紅，惹嚟公眾猛轟，噚日高盛又俾《華爾街日報》踢爆對客戶厚此薄彼，只益大戶同自己嘅traders（交易員），每周提供獨家投資貼士，被外界批評有違花旗國證監法例要公平對待客戶嘅精神。
據《華爾街日報》報道，高盛每個禮拜向大客同自己嘅traders提供獨家貼士，普通客戶要等成個禮拜先收到份報告，結果大客早着先機賺錢。最重要係呢份最新投資貼士，同畀當時普通客戶嘅所謂update報告，可能係背道而馳，結果令佢哋隨時作出錯誤投資決定。
解釋屬短炒冇不公平
報道一出街，當然被抨擊，高盛就解釋話，投資貼士只係短炒，唔係長線預測，所以冇對客戶唔公平喎。
究竟有幾多錢先可以做到高盛嘅大客？華華唔清楚，不過報道話連有2000萬美金投資金額嘅客戶，即約1.56億港銀，都係俾高盛當做魚毛，睇嚟要晉升做高盛大客，點都要過十億港銀身家。