雷曼迷債風波搞到一頭煙，本港各大銀行被迫實施俗稱「人雞分隔」嘅銷售策略，以後賣理財產品必須要分開櫃枱處理，兼錄晒音超詳細講解投資風險，次次都搞成粒鐘，買賣雙方都嗌頭痕。
措施僅「小修小補」
公民黨立法會議員湯家驊（Ronnie，圖）噚日出席香港投資基金午餐會時就批評，措施只係「小修小補」，解決唔到絕大部份投資者冇專業知識嘅根本問題。
佢話會喺新一份施政報告出爐前，向特首再反映，應盡早成立超級監管機構嘅必要性，況且呢個概念其實係大勢所趨。咁點解唔改善現行機制就算？Ronnie反駁話，投資產品分類日漸模糊，但就由金管局、證監會、積金局同保監處多重規管，冇乜統一監管標準，要各大阿頭加強溝通睇怕得個噏字，因為要鞏固「私人王國」勢力，迷債災難就係好例子，倒不如一了百了，由一個「警察」為金融監管作系統性改善好過。