愛華頓終於送走尼史葛呢個瘟神！咁咪好囉，既然尼史葛都唔想留喺葛迪遜公園球場，家愛華頓將佢賣畀曼城，執番2,400萬鎊（逾3億港元），總算係圓滿結局。
曼城今夏買唔到車路士中堅泰利後，即時轉斟尼史葛，但先後出1,500萬鎊同1,800萬鎊，愛華頓都唔肯放人；弊在尼史葛知道如果過檔曼城，周薪可由4萬鎊跳升至9萬鎊，即時同愛華頓玩嘢，喺英超首戰主場對阿仙奴時夢遊球場，連累球隊慘敗1:6。
尼史葛投曼城簽約5年
領隊隊莫耶斯都買尼史葛怕，唔敢再出佢，前晚作客般尼場英超要靠菲臘尼維利頂佢個位夥拍尤保打中堅，但一樣揩嘢輸0:1：開「咧」兩場輸晒，仲因得失球差而排榜尾，真係幾肉酸。
輸畀般尼後，愛華頓決定唔再同27歲嘅尼史葛糾纏，將佢賣畀曼城；只要尼史葛禮拜一通過體測，就會同曼城簽約5年，而愛華頓亦可正式送走呢個瘟神。或者愛華頓球迷會覺得尼史葛好衰仔，但球員黃金期唔長，佢都係趁自己有價有市搵多兩個錢，所以咁做都係無可厚非。
愛華頓上季一對正選中堅菲臘積基爾卡同尼史葛，一個因膝傷起碼要「唞」到10月尾，一個就走咗，家搞到莫耶斯頭到痕埋；莫耶斯批評球會高層早就應該賣尼史葛，等佢有時間搵替補，家陣臨急臨忙都唔知去邊度搵中堅。我求大俠收到風，莫耶斯諗住用900萬鎊簽史篤城新星梳爾哥斯。
斟史篤城新星梳爾哥斯
除咗梳爾哥斯，莫耶斯仲計劃用1,000萬鎊簽莫斯科火車頭左翼兼隊長比耶列甸洛夫；賣走尼史葛，愛華頓有機會執番兩件，計落點都有賺。話晒愛華頓上季英超攞第5，希望佢哋處理完呢單轉會風波後，可以重整旗鼓，踢番出本身水準啦！
話時話，曼城呢個周末會作客立立亂嘅樸茨茅夫，即管睇吓尼史葛同高路托尼呢對價值4,000萬鎊嘅中堅組合，係咪真係物有所值啦！
