今夏球員轉會市場，還有大約一星期左右便關閉，有人認為西甲皇家馬德里被曼聯當成羊牯，8,000萬鎊（逾10億港元）買入基斯坦奴朗拿度（C朗）實在太貴；但話晒C朗是應屆歐洲及世界足球先生，所以皇馬充其量是有買貴冇買錯，總好過某些球會用1,000、2,000萬鎊買入一些垃圾球員，等同掟錢落鹹水海。
曼聯買夏格維斯被搵笨
在超級市場，一件原來賣10元的貨品突然減至3元或5元，肯定有蠱惑，十居其九都是就快過期；夏格維斯在06年世盃後值2,500萬鎊，但一年後身價跌至1,700萬鎊，點解？皆因他的傷患紀錄厚過電話簿。曼聯領隊費格遜在07年夏天以為執到筍貨，結果夏格維斯只踢了一季，便由去年9月開始再沒有比賽，復出遙遙無期，更有收山可能。
利物浦領隊賓尼迪斯話新簽入阿古蘭尼，在正常情況下值2,500至3,000萬鎊；連他自己都識講在正常情況，弊在阿古蘭尼現在是不正常，還在養傷，見有人出2,000萬鎊，難道羅馬仍企硬要2,500至3,000萬鎊咩？賓尼迪斯死撐話買平了很多，其實做了儍仔；學吾中話齋，出得起2,000萬鎊，買目前效力標準列治的迪科亞好過。
車路士攞里昂着數
我堅信平嘢冇好、好嘢冇平。一個名牌袋雖然動輒數千元，但至少可以用十年八載，款式亦唔落伍，計落除笨有精。05年夏天車路士被里昂㩒住搶，花了2,440萬鎊才能購入當時還未「響朵」的艾辛，但事實證明他們表面上是俾人搵笨，實際上是攞了里昂着數，因艾辛今時今日已成為全球最厲害的防守中場。
青蛙仔
（周一）法比奧‧（周二）吾中/青蛙仔‧（周三）藍鑽石‧（周四）守丹‧（周五）牽牛