國寶大熊貓盈盈同樂樂嚟咗香港都有一段時間，海洋公園希望佢哋明年初開枝散葉。海洋公園方面同八方講，熊貓女盈盈最快出年2月首次發情，屆時或者會安排樂樂同佢「行埋」，但樂樂始終仲細，啲精子未必夠成熟令盈盈懷孕，因此唔排除會借用安安嘅冷凍精子，幫盈盈人工受孕。
雌性熊貓每年只有幾日發情，因此海洋公園非常緊張，希望盈盈成為首隻喺香港生BB嘅熊貓。盈盈呢個月16號剛剛過咗4歲嘅生日，通常熊貓女4歲半可以生第一胎，因此園方諗住把握機會，等盈盈同樂樂明年初交配，否則就要等到2011年。
海洋公園舊年喺樂樂尿液樣本發現精子，但唔代表一定可以令盈盈受孕；如果搞唔掂，海洋公園就可能會向安安借種。