有時睇嘢就唔好淨係睇一面，尤其係準備打量呢架新車嘅時候。從側面睇，無論Size、外形都十足十一架電單車咁，但只要轉個角度睇吓車頭，兩個車轆加可愛圓渾造型，立刻變成貌似《變形金剛》入面嘅大黃蜂。呢架古靈精怪究竟係乜？其實佢係名為Can-amSpyder嘅三輪車，今日由電單車不離手嘅傑志球員盧均宜親身試車，答案係：「穩到坐喺上面頂頭槌都仲得呀！」
記者：許維雅
攝影：林栢鈞
Model：Chimpy@Puremodels
無22牌無得玩
由加拿大入口嘅Can-amSpyder，睇見佢外貌，好多人好自然將佢歸類為電單車，但正統嚟講佢其實係一部三輪車，因為所需嘅駕駛執照都唔同。呢部三輪怪獸Spyder係由加拿大BRP製作，公司之前一直主力生產快艇、引擎、雪橇、水上電單車等產品，Can-amSpyder嘅構思概念其實係來自電動雪橇，更係佢哋首部嘅汽車研發，Can代表Canada，而am則代表America。
Spyder嘅上半身外形的確有啲似雪橇，但下半身就係一架變種有三個轆嘅電單車，奇特罕見嘅時代感造型，再加埋黑黃色主題嘅有型外殼，去到邊都搶盡所有人目光，行緊車停燈位有人撩、影緊相有車迷經過都專登返轉頭睇，坦白講，佢嘅矚目指數真係勁過法拉利，因為大家都唔知佢係咩嚟。大部份人第一句問嘅都係：「出到牌咩？」出到！不過車主一定要有22號牌先揸得，因為Spyder係屬於機動三輪車，不過其實你只要有3號牌（即電單車棍波牌），都會自動兼有22號牌，若你得3A電單車自動波嘅話，咁麻煩你要去再考過喇。
入彎當ATV咁揸
睇外表就好似成架玩具車咁，其實力量一啲都唔輸蝕，四衝水冷1公升V2機器、DOHC八汽閥、57mm電子燃油噴注系統，輸出106匹馬力及104.3Nm扭力，加埋ROTAX呢個名牌信心標記，內涵夠晒料畀你飆。所以，揸咗電單車多年嘅盧均宜都大讚Spyder好玩好爽，不過就要提醒大家第一大戒係唔可以當佢係電單車，「因為佢絕對唔係靠傾斜車身入彎，如果慣性將電單車壓車過彎嘅技巧用嚟揸Spyder，咁就會好辛苦。其實只要好似揸ATV沙灘車一樣咁用手轉彎就得，反而洗腦從頭學揸就仲容易。唯一要多啲時間掌握就係高速入彎，因為離心力都幾強，最好方法係上半身微微向彎心內傾，咁就可抵銷離心力。」
其實揸Spyder嘅最大吸引力，係唔使煩點平衡，停車又唔使用腳落地支撐，穩定操控勝過電單車百倍。再加上一系列房車化嘅安全設施，如VSS車身穩定系統、ABS防鎖死煞車系統及SCS穩定控制系統等，識得喺高速入彎時自動偵測危險，發覺頭轆撬起就會自動Cut火，安全程度又爆燈，啱晒一眾怕揸電單車易炒嘅女生。最後論實用程度，你真係唔當佢係玩具都唔得，代步用趕時間唔攝得位係其一，第二係揸出街泊喺邊都有排你諗。所以都係帶佢出街威一兩個圈就算，唔使等都大把人望已經夠你過癮。
Can-amSpyder規格
引擎：990cc四衝水冷V2DOHC
馬力：106hp/8,500rpm
扭力：104.3Nm/6,250rpm
傳動：5前速半自動+/-波箱
售價：$198,000
查詢：文偉電單車中心（25675707）
