香港運動員唔係臘鴨，香港社工亦唔係河蟹，民政事務局局長曾德成三言兩語成功施壓逼走女青年會社工謝世傑，社工界草泥馬紛紛反抗，本身係社工嘅民主黨黃成智噚日帶隊去政府總部以及女青年會總部請願，其間大叫「假和諧、真施壓」、「社工一心為居民、局長鬼鼠竟趕人」等口號，抗議「河蟹曾」橫行無忌。
雖然河蟹曾堅持冇施壓，但相信黃成智同全港市民一樣打死都唔信，事關河蟹曾位高權重，一句說話足以攆走人，唔通真係下下要畫公仔畫出腸？社工唔係擦鞋仔，黃成智力撐同僚唔應該奉迎權貴，希望政府成立獨立委員會徹查事件，同時力促女青年會公開道歉，唔好再錯落去。