講過大花筒嘅內房股，今日講眼光好、財技高嘅瑞安建業（983）。話說當年97年2月瑞安成功趁港股節節上升、恒指剛突破萬二見萬三點時乘勢招股，上市半年，恒指就喺16820見頂，當時港人多仍沉醉於回歸前加世紀末風情之中，股民對亞洲金融風暴前奏之泰銖淪陷毫無風險意識，大家只顧炒股炒樓賺快錢，12年人事幾番新，當年9蚊招股上市的瑞安，今天仍賣9蚊咁上下，難得冇走樣，仲派咗唔少息，兼生咗幾件㖭。
06年10月，瑞安幾經艱苦分拆瑞安房地產（272）上市，成功收番30億元；07年6月，再分拆處理內地爛尾樓的中華滙於倫敦AIM上市，大家睇睇上市時間之掌握，就明白咩叫抓緊機遇。現時瑞安仍持有瑞房9.5%股權，主業仍然係水泥建材，最近成功私有化中華滙，正式轉型做內房收買佬，營運模式將以瑞房打一線新樓，瑞安就繼續低價買入爛尾盤，執靚靚再放售圖利。
高賣低買 私有中華滙
此等收買佬性格，主席羅康瑞在中華滙私有化過程中作出完美演繹，一洗被忍者龜屈機輸幾千萬之頹風。睇番兩年幾前分拆中華滙在倫敦上市，加埋發行的可換股債券，當時足足袋咗39億港紙落袋。呢次趁中華滙喺倫敦跌到價殘無人理時，即以高溢價私有化，總代價只係29億元，一沽一揸，淨袋10億元，足足係中華滙去年盈利8倍。
做收賣佬，最緊要喺行業缺水時執筍嘢，所以附屬公司剛以9.2億元，向盈大地產（432）買入北京朝陽區1.41萬平方米的在建項目，進一步加強中華滙於市中心之實力。密密買唔手軟，除咗私有化有咁大進賬，中華滙亦好叠水，有現金20億元，加上無負債，私有化後對瑞安有好無壞，增加每股資產淨值之餘，亦可整靚整體土儲水平。目前瑞安市值45億元，上年賺5億幾，以中華滙市值近30億元，上年賺過億計，市場似乎低估佢嘅盈利貢獻。
內地地王價碼不斷創新高，水頭總有短缺時，加上中央要打壓，嚴防違規貸款，中小企發展商好有可能重蹈07年樓市泡沫覆轍，到處都係爛尾工程。以瑞安市盈率只得5倍，市場尋找落後寶藏，遲早會被摷到，留意股價同成交表現，察看幾時有資金密密吸呢隻好市又賺、爛尾撻定都唔死得嘅瀕臨被遺忘內房股。
胡孟青