黎明《DreamWedding演唱會2009》前晚移師到廣州體育館舉行，全場滿座，當晚的演出和香港的大致相若，除了有他的新寵文詠珊（JaniceMan）擔任嘉賓外，愛將衞蘭（Janice）也到場表演，Leon更透露唱片公司和寰亞合作開新戲，由雙「J」擔正做女主角，看來Leon對兩位愛將同樣愛錫。
雖然現場觀眾對JaniceMan不太熟識，但不少少男觀眾甫見她都大讚靚女。當晚Janice穿上約6吋高踭鞋上台，落樓梯時一步一驚心，難怪她在台上拍拍心口說：「好高好驚呀！」
怕在鳥巢開騷
當晚Leon抱恙上陣，他在慶功宴上說：「開騷前我食咗少少嘢，點知有啲水土不服，好彩上到台又唔記得咗。」Leon表示現正斟洽在內地其他地方演出，問他可想過在鳥巢開騷？他笑言：「冇呀，太大啦，我企喺鳥巢中間好似粒芝麻，我唔想喺鳥巢芝麻度開騷。」
至於前日是女友樂基兒生日，Leon表示：「冇乜特別慶祝，送禮物同喺屋企食飯，之後瞓覺，佢喺美國返嚟都好攰。」是否親自下廚？Leon笑稱：「唔係，叫外賣，我冇時間煮，唔好意思叫佢整。」
採訪、攝影：曾小嘉