由幾位猛男主演嘅《竊聽風雲》有票房又有口碑，財爺鬍鬚曾亦買飛入場。佢大讚套戲嘅編劇同導演有心思，演員用心，唔知係咪因為題材涉及金融犯罪等大眾關心嘅議題，所以叫好又叫座，更誇張地話喺呢套片睇見港產片嘅希望。
話港產片有望
雖然鬍鬚曾喺外地長大，但原來佢一直熱捧港產片，噚日喺個網誌度憶述，住喺波士頓時，當地好少華人，所以片商一星期只會租用一次喺唐人街附近原本放三級片嘅戲院，喺晚上9點過後播懷舊港產片。當時啲華僑都唔嫌戲舊，好享受呢百幾分鐘嘅「文化逃亡」，所以次次都fullhouse。但如果想睇新嘅港產片，就要揸車由波士頓去到紐約，穿州過省先至睇到心頭好。
回歸香港之後，鬍鬚曾繼續熱捧港產片。佢話當時住喺佐敦站附近，好多時同太太等阿仔瞓着後，先至慢慢去附近戲院睇午夜場，諗起當年周星馳同近年無間道系列電影都非常回味。近年港產片無復當年勇，但鬍鬚曾依然睇到港產片前景，話香港不乏創意人才，港產片希望在明天喎。