煲呔大張旗鼓話要發展六大產業，包括創新科技，仲話嚟緊10月發表嘅施政報告會重點講點落實。話口未完，離任在即嘅香港科技大學校長朱經武噚日踢爆，特區政府對科研發展支持根本不足，遠遠落後於鄰近地區，仲話做領導嘅要放下身段，多聽民意，唔應該一味強推行政命令。對於一向長官意志行事嘅煲呔，呢段臨別贈言可謂當頭棒喝。
批評只重短期回報
下星期就會離港返美國繼續科研工作嘅朱校長噚日出席商台節目，大談過去八年喺香港同科大嘅所見所聞同所思所想。其實香港話發展高新科技都唔係始於今時今日，老董年代已經咁講，當年就係老董搵朱經武入科大。不過，回歸以來特區政府講就天下無敵，做就有心無力，搞搞吓煲呔做咗特首，連工商及科技局都變鬼埋做商務及經濟發展局，唔提「科技」。朱校長噚日話，當時對科研人員都好大打擊。
好嘞，家又搬返「科技」出嚟。朱校長直言，香港一直冇政策支援科研成果商品化，過去唔少本地嘅科研成果，專利權都被其他國家買咗，例如有台灣、日本公司買咗之後去東莞開廠請人生產，令香港最後冇乜得益，亦令本港錯失發展高新科技嘅良機。
朱經武又批評，就算得到政府資助，但當局過份看重眼前成果、短期回報，唔明白科研需要長時間投資，日日問住你搞成點，令科研人員好氣餒。佢仲打咗個好抵死嘅比喻，話如果日日問住佢朱經武點解仲生存喺度，要日日畀飯佢食，佢都唔識答。創新科技署夜晚就回應話，轄下嘅創新及科技基金成立以來，已批出超過40億元進行逾1,500個應用科研項目。
曾經多次當選為最受歡迎大學校長嘅佢又分享經驗，話作為領袖，最重要係有承擔，唔可以下下壓喺人哋頭上下達行政命令，要放下身段多聽民意，如果政策有失誤，就要出嚟承擔責任，唔可以賴話呢啲係某某下屬嘅工作，唔關自己事。
從政者亦應該係咁，好似近排因救災不力俾民眾狂鬧嘅台灣總統馬英九，喺台灣長大嘅朱經武話小馬哥以前係威權政治下嘅管治精英，但家做咗民主社會嘅領袖，就要同老百姓多啲溝通。朱校長雖然冇點名評論我哋嘅曾特首，但八方認為，煲呔一向剛愎自用，好似近排一聲令下唔理各界質疑都要去馬嘅校本驗毒計劃，就係唔尊重其他人意見、只憑長官意志行事嘅又一例證。
mailto:[email protected]