基金F話內地城市啲樓盤，好多係賣畀外地人，佢有啲疑慮。左丁山笑言：「我哋香港樓咪又係，西九豪宅嘅買家，據講係內地同胞居多，我哋邊度有資格用萬九、兩萬銀呎價入貨吖！」基金F解釋，本地寫字樓與豪宅可以睇高一線，因力拓（RioTinto）事件，震動跨國公司，既然力拓胡士泰及中國籍僱員可以涉嫌賄賂，偷機密資料，其他跨國公司僱員亦可能隨時踏中地雷，考慮到安全，法律保護，司法公正等等，外國公司本來想在上海設立中國總部嘅，不如諗過先，以香港為地區總部，會唔會更好呀？大凡外國公司在亞洲設總部，地點不外乎香港、東京或新加坡，後來加埋上海。現在大家都吼住中國市場，跨國公司只會有兩個選擇：上海或香港，東京與新加坡逐漸不合時勢需要咯。
呢日賓架P間銀行嘅首席經濟師駕臨香港作退休前最後一場公開演講，左丁山特登去聽吓，呢位在歐洲大名鼎鼎嘅Prof.Dr.NorbertWalter認真巴閉，退休前到亞洲巡迴演講，自七月二十六日起至九月一日止，三十八日內到二十一個城市演講，由孟買講到東京，聽眾都戥佢辛苦，佢去完胡志明市、河內之後就嚟咗香港，跟住去廣州北京上海、台灣、馬尼拉、首爾，九月一號以東京為終站，佢到每一處都講“Worldwiderecession-howdeep,howlong?”，以及對當地嘅一啲觀察。八月二十日在金鐘香格里拉大宴會廳，座無虛席，賓架P滿場飛，招呼佢哋銀行嘅人客，又要上台介紹Walter博士，好唔得閒，左丁山有見及此。無謂打擾佢，坐埋一角，吃過午餐，聽吓知名人物有乜講先。博士話呢場衰退之深，戰後罕見，目前雖有到底跡象，但未有確證，歐洲仲係未掂，各國政府負債太高，難以長期維持，美國亦然，但美國有一個好處就係企業有裁員自由，可盡快降低成本，恢復競爭力，而奧巴馬總統又係一個傑出人物，故此美國可望首先走出衰退，與亞洲一齊帶領世界復甦！講到香港與上海之爭，佢話香港在金融方面，目前佔盡優勢，香港應該搵人向北京講清楚，上海仲未夠班，無謂同香港爭做金融中心吖！