台資殯儀管理服務商中國生命，暫定9月初喺本港久旱嘅創業板上市，但就冇預散戶份，主席劉添財噚日來港為本周五路演造勢，佢話擔心公眾對公司唔理解，況且集資規模唔大，所以只用配售方式畀機構投資者入飛。
呢間「大酒店」98年喺台灣高雄創立，06年喺重慶開業，嚟緊打算進軍成都、湖南、長沙同埋天津等地。搞得咁成功，劉總話最緊要有愛心、耐心同埋善心，專業形象亦不容忽視，旗下台灣分部效率最高，約40分鐘已可到達喪事現場處理遺體，近九成職員係大學畢業，入職前要先試穿壽衣又瞓棺材，親身體驗先人感受。
做殯儀都要講創意
佢賣花讚花香話，中國生命以創意見稱，好似早排將靈堂搭建為賣菜攤檔，以紀念一位29歲守寡、靠賣生果捱大兩個仔讀博士嘅慈母，雖然辛勞過世，但走得光榮。劉總強調，內地人喺喪事同婚事開支唔差幾遠，豪使得嚟可超過10萬銀，但公司宗旨係提倡「慎終追遠」，最近台灣南部水災都有義務救災。