半導體公司品質國際（243）佔股43.22%嘅美國附屬公司樂依文虧損多時，上周五決定徵召一名「公司醫生」出任首席重組官兼暫代行政總裁幫手救亡，品質國際主席李同樂就會留任顧問一職。
Thompson話會搞掂樂依文重組
呢位救星EricThompson，喺芝加哥大學MBA畢業，過去十年先後令歐美及亞洲多間企業扭轉乾坤。佢曾經幫新加坡上市嘅DakaDesigns搞過東莞生產及裝配業務重組，咁啱樂依文喺當地亦有廠房，Thompson未來亦會重駐東莞，同時會就2011年到期嘅樂依文9.25厘優先票據，同債權人商討達成財務重組安排。
佢拍心口話，會協助各方達成圓滿方案，帶領樂依文財務重見穩健狀況咁話。
之不過，若果樂依文未能維持資金水平，作為大股東嘅品質國際講到明，會對公司銷售、經營以至業績前景都會產生重大不利影響，但目前仍然接受樂依文嘅採購定單。咁就要睇呢位Thompson先生可唔可以幫到手嘞。