計劃9月喺港交所（388）主板掛牌嘅內地綜合媒體民企現代傳播（072），公司宣傳工夫當然唔嘢小，原來搵到兩位猛人入局做獨立非執行董事。首先介紹嘅係「內房龍頭」萬科企業嘅主席王石（圖），佢幾年前率先劈價賣樓保存實力，睇準樓市嘅功力無人不讚。
富豪江南春亦助陣
至於另一位獨董就係分眾傳媒創辦人江南春，分眾03年喺美國納斯達克上市，佢身家超過90億，喺「2008全球華商富豪500強」排第136位。
現年36歲嘅江總，上月底仲娶埋已經「有餡」、祖籍台中嘅鳳凰衛視女主播陳玉佳，喺當地舉行「江陳會」世紀婚宴，台中市長胡志強亦有到賀，真夠面子。
講番現代傳播呢間公司，雖然只喺1998年成立，但發展速度驚人，03年7月收購咗香港《號外》雜誌，目前喺內地經營8份消閒刊物，以《周末畫報》最為厲害，去年廣告收益名列全行第3。呢盤潮爆生意咁掂，搵番兩個猛人幫手，可謂「強強聯合」。