沉寂一時嘅鼠王芬再次出動，但唔係去捉老鼠，而係飛去北京同佢自稱嘅恩師、前《基本法》草委許崇德賀80大壽。人到禮自然都要到，佢非常揼本咁，送咗一個象徵長壽嘅金壽桃畀恩師。
鼠王芬話，佢當年去北京讀法律，喺中大成為一時熱話，因為個個同學都去外國進修，惟獨佢堅持赴京。事實證明鼠王芬背靠神州嘅決定冇錯，否則邊得嚟中聯辦厚愛？「護法」許崇德係當年教鼠王芬《基本法》嘅導師；如果冇許老師，鼠王芬未必有今日咁「出眾」嘅法律知識。清華大學法學院長王振民同港澳辦副主任張曉明都係許崇德嘅得意門生，鼠王芬掹車邊都同呢班內地「紅人」有少少師兄妹關係，難怪咁高興。