敏妮嘅健身教練某日問，有乜好投資建議？佢冇投資經驗，預計每個月儲千幾蚊。敏妮二話不說叫佢月供股票，佢咁後生，即使遇到市況逆轉，亦有大把時間追番，可以承擔較高風險。
不過敏妮同佢講，儲蓄最緊要嘅唔係諗用乜方法，而係先定目標。就以教練為例，敏妮呢頭同佢講完可以月供股票，佢已經問係咪儲到咁上下，見股價升就沽咗佢獲利！有咁嘅反應係因為佢儲蓄冇特定目標，所以見有盈利就沽出股票。唔係話月供股票就一定要長揸，敏妮自己都計劃股市炒到癲時，沽咗月供嘅港交所（388）。問題係，敏妮套現後會有後着，但相信教練應該冇。
定下目標易長期作戰
先確立目標，最大原因係令理財計劃可支持落去，試諗吓如果毫無目標，就會因一時市況上升，獲利後亂咁消費，將儲蓄返嚟嘅錢都使埋。不過對於好多年輕人嚟講，真係冇乜目標，尤其同家人住，每個月只要畀少少錢做家用，就可以大安旨意食屋企、住屋企，剩咗嘅錢自己使。
教練女友啱啱去外國讀書，兩年後先返，佢暫冇結婚計劃，亦無置業打算，問佢有乜目標，佢諗唔到！財務策劃師遇到呢啲客都咪話唔企喺度，惟有向佢sell保險。不過佢係敏妮教練，敏妮先係佢個客，所以唔使向佢硬銷啲乜。
人無遠慮必有近憂，理財目標其實就係解決呢啲遠慮同近憂。暫時冇諗結婚置業，但唔係以後都冇呢個計劃，既然佢每月可以儲嘅金額唔多，就更加需要將戰線拉長。以複息計算，每月儲1000蚊，每年回報9厘，10年有19萬蚊。如果只得5年時間，同樣月儲1000蚊，要有超過40厘回報先有19萬蚊，否則就要月供超過2500蚊，先有19萬蚊。
攤長嚟儲，月供可以少啲、輕鬆啲，好過到有需要時先嚟儲，得幾年時間準備，到時負擔重，仲可能要承擔更高嘅風險。
溫敏妮
http://wanmanli.com/blogs/