下月尾就做老竇嘅朗尼向來浮誇，做乜都要話畀全世界嘅人知；前幾日佢就約埋班親友去柴郡間豪宅參加「4D睇BB派對」，現場睇吓老婆高蓮（圖）肚入面嘅小朗尼係乜嘢樣。雖則效力曼聯嘅朗尼俾網民話無聊，但你咪理，大肚嘅高蓮令朗尼就嚟榮升爸爸級球員，仲帶挈佢入球不絕兼加人工，朗尼哥可謂一炮三響。
招待親友4D睇BB
用超聲波照BB係屬於好私人嘅事，但朗尼同老婆高蓮就唔係咁諗，反而好急不及待要話畀親友知，小朗尼個樣同現況係點；喺本月初，佢就喺市值350萬鎊（約4,500萬港元）嘅寓所搞咗個睇BB派對。
朗尼用300鎊租一部4D超聲波掃描機，成個過程大約用咗30分鐘；據有份出席呢個派對嘅人士表示：「我哋清楚睇到小朗尼嘅五官同輪廓，而且仲見到佢喺度不停咁郁㖭！朗尼同高蓮都好興奮，不停同啲親友講小朗尼點樣點樣；小朗尼就快出世，所以佢哋更加興奮，心情亦越嚟越靚。」
又入兩粒成英最高薪
同朗尼成個餅印嘅小朗尼，雖則起碼要到9月尾先同大家見面，但已為朗尼帶嚟好運；朗尼除咗有望首次有囝囝幫佢慶祝生日（朗尼喺85年10月24日出世），就快做老竇亦令佢心情特別靚，連帶場上亦有好表現。
喺前晚場英超，朗尼梅開二度助曼聯作客大勝韋根5:0，開「咧」至今4場入4球，喺紅魔嘅入波已累積到101球；雖然佢同曼聯仲有3年合約，但曼聯為免佢被撬走，計劃將佢周薪由現時10.5萬鎊，大幅加至逾15萬鎊，令佢可以同車路士嘅泰利同林柏特，以及曼城嘅羅賓奴、泰維斯同艾迪巴約睇齊，成為英超最高人工球員。