科大校長朱經武離任在即，噚日喺港台節目《香港家書》披露當年獲聘做校長內幕，佢話決定接受聘書後，有人問佢太太，朱經武喺美國研究工作順利，生活舒適，點解要去一個生疏地方，做一份從來冇試過嘅工作？朱太話因為朱經武黐咗線。
後來有人又問朱經武，佢連院長或副校長都冇做過，點解科大會請佢做校長呢？朱經武話，可能校董會班人都黐咗線。黐上加黐，朱經武話可能「負負得正」，得出一個雙方都滿意嘅結果。朱經武形容自己做校長角色係啦啦隊隊長，為學者、學生提供良好環境，而佢創辦同領導德州超導中心，令佢累積唔少管理經驗，又要同政治人物交手籌募經費、與傳媒打交道，呢啲經驗對做科大校長好有用。