澳門概念股對上星期五逆市彈升，買同類落後股，揀超筍豐德麗控股（571）。豐德麗最新NAV4.30元，現價1.14元，挨近04年時水位，相對NAV折讓，高達74%，講折讓，豐德麗吸引到爆。而家吓NAV折讓，亦仲未反映集團喺澳門發展嘅大型綜合項目「星麗門」，隨住項目落成投入服務，豐德麗NAV又有豐厚嘅重估價值。又豐德麗揸咗現金16.5億銀，債項講緊得2億銀咁大把，淨現金高達14.5億銀，已經高過集團總市值14.1億銀。
要咁睇，就算個市短期再動盪，豐德麗超級現金牛，已經可以穩守，再講，豐德麗揸住大把銀彈，亦足夠畀集團拓展澳門業務。對上星期五，銀河娛樂（027）及信德（242）逆市都有唔錯彈升，追落後，揀豐德麗。又係咁意以集團0.4倍PB做目標，價見1.72元，已經代表現價翻半番，目標價PB，實情仲有大把收窄空間。
遠展谷底反彈冇難度
遠東發展（035）最新NAV2.93元，現價1.85元，折讓約莫37%，但連埋酒店資產重估，保守計數，NAV起碼上3.60元，折讓挨近50%，算係吸引。又遠展09年度（3月底止）純利倒退8550萬銀，倒退咗80%。但隨住集團最近兩年度，狠撥狂減證券投資，加埋集團香港酒店業務根底好，2010年度谷底反彈，應該冇難度。呢期市場期待深圳非戶籍今年10.1自由行，香港酒店股有多個Point炒。呢轉短打，博遠展升20%到2.20元，未有耐到NAV水位。
錢雋