東亞運動會話晒都係香港盛事，火炬傳送竟然是是但但喺TVB電視城做終點，真係令人O晒嘴，唔通因為堆填區令人心曠神怡？呢種咁是但嘅安排，一向針對無綫新聞是是但但嘅「事旦男」又點可以忍？所以佢又再出動抗議。
抗議無綫做獨家
以前多次成功出位嘅事旦男，噚晚7點幾鐘帶埋自製標語，山長水遠走入將軍澳電視城門口，高舉「港人要作主回購東亞運」嘅紙牌，佢話東亞運係全港盛事，火炬傳送最後一棒冇理由畀無綫做獨家，因此要求當局更改安排，唔好又益TVB。
狙擊TVB向來快而準嘅事旦男今趟終於失手，原來佢今鋪收錯料，噚晚係港姐決賽，以為電視城一定好熱鬧，佢一出現又成為焦點，點知港姐決賽其實喺紅館舉行，電視城位處將軍澳工業邨一隅，加上又係周末夜晚，真係鬼影都唔多隻，連無綫保安都費事理佢，由得佢喺門外靜坐。事旦男發現自己中咗空城計，是是但但抗議10分鐘就鳴金收兵。