活力先生請食飯，最鍾意到名氣不大，在佢眼中認為物有所值之飯店，永唔會去私人會所及大酒店，以及著名食店。呢晚佢在河鮮專門店設局，一味油浸筍殼食到眾人牙，一煲魚湯，新鮮無比，賓架Ｗ急忙叫來一碗白飯，唔肯等吃單尾。財務Ａ就向喼頓詐型：「乜我上次自己嚟，冇咁好食喎？」喼頓連忙陪笑：「唔會，唔會，我哋一視同仁嘅！」騎騎，到呢間河鮮專門店，要講吓活力先生個名至得，好似到一啲名店，講兩聲係蔡瀾朋友，便零舍唔同。不過有時都會撞板嘅，某次公關Ｙ用好朋友韓才子之名向某食肆訂位，時屆，公關Ｙ對知客話：「韓公訂位。」點知知客冷哼一聲：「有三間房都話係韓公訂位喎。」搞到公關Ｙ十分尷尬，以後唔敢用韓公或朋友之名嚟訂位矣。
食到捧肚之時，大家要基金Ｋ講股市，基金Ｋ係基本實力派，老早話咗唔好追貨，但個市一路係咁升，佢幾乎自認敝鄉，但賓架Ｗ聽晒佢話，二萬一千點時，立即出貨，故此呢晚哈哈笑，基金Ｋ話股市升得過龍，回吐係必然之事，佢預期下半年內地唔會再次猛增新貸款，暫不宜趁低吸納，要睇定啲先。
基金Ｆ就話最近到內地幾個城市旅行，人哋去睇觀光景點，佢就去睇地盤，睇樓盤，發現一個內地樓市共通之處，就係買樓人士多係外地人，本地人較少幫襯。譬如去到大連，發展商話好多吉林客、哈爾濱客嫌北面太冷，要在大連置業；到咗蘇州，發展商話好多上海、南京、寧波人嚟買樓；到咗廈門，發展商話有好多買家來自福州、泉州、台灣……基金Ｆ話：「聽得呢啲資料多，就引起我嘅疑慮，係唔係（一）當地人冇錢，還是（二）當地人知道好多內情，所以唔在本市買樓？後來再了解多啲，好多新樓係冇人住嘅，發展商話賣晒，但十室九空，晚上成棟大廈只有寥寥燈光，證明樓盤單位落在外省、外市投資者或炒家手中。一旦利率上升或中銀監嚴控違規貸款，呢班炒家就會死火嘅嘞。買內房股要查清楚先至好！」講來講去，基金Ｆ還是睇好本港地產，佢話Wal-Mart與BASF來港設地區總部，係一個好兆頭喎。