社會福利署新署長聶德權今個禮拜一正式開工，噚日同傳媒茶敍，講吓工作大計。前署長余志穩出名肯聽民意，民望高企，珠玉在前，聶德權就話唔會有壓力。佢講笑話自己姓聶，又戴眼鏡，所以有三隻耳仔、四隻眼，會多接觸同事聆聽意見。
佢返工第三日，就即刻落區去巡天水圍，探訪社署綜合家庭服務中心，又去新生會同信義會了解吓精神健康同青少年吸毒輔導服務，兩隻腳署長周圍巡好忙碌。新官上場，三隻耳署長話好關注落實整筆撥款檢討報告嘅改善建議，會留意多啲家庭同青少年服務，同埋想促進唔同專業界別合作。
會約見YWCA
整筆撥款一直係社福界最大計時炸彈，搞到社福機構成日被批評剝削員工，甚至要睇高官臉色爭取資源。最近YWCA高層因為民政局長「河蟹曾」一聲和諧，就調走被鄉紳投訴嘅大澳社工謝世傑，觸發社福界發動抗河蟹運動，相信三耳署長有排煩。聶德權話會約見YWCA，不過唔係傾河蟹事件，純粹正常溝通。