翻版隨時觸犯法例，但亞視節目《香港亂噏》卻以老翻做賣點，翻盡政界名人和娛樂圈人物，非但沒犯法，還令觀眾捧腹大笑。當中兩名亂噏台柱劉錫賢和姜皓文（黑仔）日前對對碰下，同聲力斥近年娛樂圈青黃不接，皆因新人懶到出汁，坐以待斃，想真點，他們的指摘合情合理，並非慣性亂噏。
撰文：比華利
誓死效忠亞視的劉錫賢和姜皓文近日參演節目《香港亂噏》，雖然收視不高，但卻贏盡口碑，尤其在YouTube大受網民歡迎，二人的扮嘢本色盡見真章。
劉錫賢和黑仔日前在尖沙嘴接受專訪時，他們忽然技癢，上演一幕謝賢大鬥麥玲玲，老翻四哥把追問他新抱張栢芝添丁問題的麥玲玲，耍到頭暈。二人雖沒化妝變身，但說話技巧和神髓如「上身」，令人忍俊不禁。
黑仔睇片上身
黑仔指要模仿別人，非常考觀察力，他說：「每晚接到公司通知第二晚節目要扮邊個，我收工返屋企就即刻上YouTube睇片，起碼睇45分鐘，之後瞓覺都將嗰個人物入晒腦，到第二日開工再用手機溫習一下片段，上妝埋位，我就可以完全『上身』。」劉錫賢則有另一番見解：「神來之筆係捉到被模仿者嘅特點，然後將佢無限量放大。」
問到黑仔誰是他下次要挑戰扮嘢目標人物？他充滿自信說：「我好想扮陳振聰，佢嘅官司係全城話題，已經同亞視反映咗，佢哋話會度吓。」黑仔建議扮女人靚過真女人的秦啟維反串做小甜甜龔如心，劉錫賢則扮陳振聰太太譚妙清，這個三角關係，相信必有一定吸引力。
靠舊人撐大局
《香》節目美中不足是無法突破慣性收視，但劉錫賢和黑仔都感謝外間的好評，劉錫賢指成功全賴演員間發揮團結互助的精神，他說：「亞視雖然積弱，但公司同事一直好合群，有份演出《香》嘅藝人，大家肯博肯捱，又夠合作，先會令一個節目可以搞得成功。喺節目度我哋仲要帶新人，其實幾吃力，但佢哋全部都好勤力，好肯學。」
劉錫賢指亞視近日面臨的減薪浪潮，正好為整個娛樂圈帶出汰弱留強的訊息，他語重心長說：「家娛樂圈係好唔健康，上一輩藝人好似肥姐（沈殿霞）同何B（何守信）等，佢哋係七分努力，三分運氣，但家好多知名新人，啱啱調轉，分分鐘係靠八分運氣㖭，周秀娜都係靠o靚模機會剝衫上位。」
現在娛圈正處於斷層，黑仔指來來去去要撐起大局的只有曾志偉、譚詠麟（阿倫）和四大天王等資深藝人。劉錫賢抵死說：「阿倫都25歲咗30周年啦，新人真係要爭氣啲。」黑仔則補充：「新人大忌係要人餵到飽，其實佢哋應該落啲功夫改善歌藝同演技，而唔係大家鬥排場。」
攝影：黃文成
場地：TheContinentalClub（港威酒店）
複製人秘笈
劉錫賢和姜皓文（黑仔）在亞視節目《香港亂噏》中扮演社會不同階層的代表人物，諷刺時弊，當中最令人留下深刻印象的有劉錫賢扮倪匡和反串堪輿家麥玲玲，黑仔扮議員梁國雄（長毛）和鄧麗欣（Stephy）前經理人黃柏高（Paco）等爆笑演繹，原來要扮嘢除靠服裝化妝外，如何掌握人物的神髓才最考真功夫。
梁國雄VS梁國紅
黑仔：其實我外形黑黑實實，同長毛都有幾分相似，要扮佢都好易入型入格，扮佢嘅時候，我盡量將講嘢語氣粗魯少少，令觀眾更有共鳴。
黃柏高VS黃柏糕
黑仔：由於我未接觸過Paco（黃柏高），扮佢最難，最有挑戰性，不過上次扮佢，好多得髮型師同化妝師，佢哋幫我黐咗頭套，上埋妝即刻好似上咗身咁。
倪匡VS倪康
劉錫賢：我本身係認識倪匡，重點係留意到佢講嘢唔係好清楚，但當佢一提到靚女，成個人即刻生猛晒，好興奮開心呢啲特性。
麥玲玲VS麥靈靈
劉錫賢：佢其實係一個可愛師奶，我專攻佢講嘢嘅用詞，佢從來唔會用屎尿屁呢啲核突字眼，換來係其他嘅用詞，但一定要裝可愛。
（最高分數5蘋果）
