板間房同籠屋係以前香港貧窮一族嘅蝸居，隨着社會富裕，呢類殘舊擠逼嘅居住環境已經買少見少，但係仲有約11萬人過緊呢啲非人生活。為令市民憶苦思甜，支持收樓重建，市建局特別搭建模擬舊樓，為咗令場景更加逼真，市建局落足料扮嘢，點知重手得滯，幾乎俾人投訴。
甲級商廈模擬籠屋
模擬舊樓失修單位嘅「市區更新探知館」設於市建局上環新紀元廣場總部六樓，要喺甲級商廈重建約600呎籠屋、板間房好大工程，板間房裏面嘅床鋪、籠屋個鐵籠同廚具，據講全部都係收樓時收集嘅實物，單位內有啲曬晾底衫褲都係原汁原味「黃黚黚」嘅舊物。不過大家唔使驚，呢啲陳年物品展出前已經消毒，而單位內出現嘅曱甴、老鼠同蜘蛛網，都係假嘢，唔係舊屋留落嚟嘅「原居民」。
市建局要求原來好高，唔只硬件要似到十足十，連舊區生活嗰陣味道都要營造番出嚟。市建局收慣樓冷冰冰冇乜人情味，喺邊度搵民間生活味道出嚟呢？苦思良久，工作人員靈機一觸，買咗三條霉香鹹魚擺喺展區內兩個禮拜，可惜人情味好難造假，鹹魚發臭效果麻麻，工作人員索性再加啲亞摩尼亞尿味落去，雙料齊發卒之谷到陣籠屋獨特味道出嚟。
鹹魚加尿味被投訴
點知鹹魚加尿味產生意料之外好鬼化學嘅作用，一陣異味充斥大廈，其他租戶紛紛掩鼻，以為市建局裏面有腐屍㖭，市建局造假過猶不及，即刻加強通風疏導臭味。市建局一邊收樓掃走舊社區人情味，另一邊卻喺甲級商廈造番啲假味道出嚟，勞師動眾搞咁多嘢，啲人竟然唔識貨嫌霉香鹹魚臭，如果李超人嚟到，八方肯定佢大讚心曠神怡！
市建局又確係抵鬧，有乜理由輕易就範，令噚日主持市區更新探知館開幕禮嘅林鄭局長冇得參觀一個心曠神怡嘅展覽。如果大家有興趣睇呢個冇厘味道得個樣嘅展覽，可以在市建局網頁預約，局方可安排導賞員帶隊，探知館開放時間係逢周一至周五，朝十點晚五點半，公眾假期休館。
mailto:[email protected]